ᓂᑭ ᑯᒪᒃᓯᐅᑎᒃᓴᖅ
ᓂᑭ ᐃᓅᔪᖅ ᐊᕐᓇᖅ ᐃᒡᓗᓕᒑᕐᔪᒃ, ᓄᓇᕗᒻᒥᐅᑕᐅᑉᓗᓂ, ᐊᒻᒪᓗ ᒫᓐᓇᐅᔪᖅ ᐊᖓᔪᖅᑳᕆᔭᐅᔪᖅ ᑐᙵᓱᒋᑦ-ᑯᓐᓄᑦ. ᐅᐃᓂᐲᒡ ᒫᓐᓇ ᐊᖏᕐᕋᔭᖓᐅᒐᓗᐊᖅ, ᓂᑭ ᖃᐅᔨᓯᒪᔪᖅ ᓴᙱᓐᓂᕆᔭᖓᓂᒃ ᐊᓯᐅᔨᑦᑕᐃᓕᓗᒍ “ᐃᓅᓂᕆᔭᖓ”, ᑲᓇᑕᐅᑉ ᓂᒋᖅᐸᓯᐊᓂᑦ ᖃᑉᓗᓈᓂᕐᒥᐅᑕᐅᑉᓗᓂ. ᓂᑭ ᐃᓚᒋᔭᐅᖏᓐᓇᐅᔭᖅᑐᖅ ᐃᓅᖃᑎᒌᓄᑦ ᐅᐃᓂᐲᒡᒥᑦ, ᐊᒻᒪᓗ ᐊᑐᖃᑦᑕᖅᑕᖓ ᖃᐅᔨᒪᓂᕆᔭᓂ ᐊᒻᒪᓗ ᑐᑭᓯᐊᓂᕆᔭᓂ ᖃᑉᓗᓈᓃᖦᖢᓂ ᐃᑲᔪᕐᓂᐊᕐᓗᒋᑦ ᐃᓄᐃᑦ ᓅᑦᑐᑦ ᓄᓇᓕᐸᐅᔭᕐᒧᑦ.
ᓂᑭ ᐱᒋᐊᕈᒪᓂᖃᖅᑎᑦᑎᔨᐅᔪᖅ ᒪᒃᑯᒃᑐᓂᒃ ᐊᒻᒪᓗ ᐃᓐᓇᐅᔪᓂᒃ ᓇᓂᑐᐃᓐᓇᖅ, ᐊᒻᒪᓗ ᑕᑯᒃᓴᐅᑎᑦᑎᑦᑎᐊᖅᑐᖅ ᐱᔪᒪᓂᕆᔭᖓᓂᒃ ᐱᖅᖁᓯᒃᑯᑦ ᑭᓇᐅᓂᖓᓂᑦ. ᕿᐊᕐᕚᖅᑎᐅᖃᑦᑕᖅᓯᒪᔪᖅ ᐊᒻᒪᓗ ᕿᐊᕐᕚᖅᑎᐅᑉᓗᓂ ᓱᓕ, ᐃᓕᓐᓂᐊᖅᑎᑦᑎᔨᐅᔪᖅ ᐃᓄᐃᑦ ᐱᓐᓂᑯᒋᓯᒪᔭᖏᓐᓂᒃ ᐊᒻᒪᓗ ᐱᖅᖁᓯᖏᓐᓂᑦ ᐊᒻᒪᓗ ᑎᑕᒃᑎᐅᑉᓗᓂ. ᓂᑭ ᑕᑯᒃᓴᐅᓯᒪᔪᖅ ᐊᒥᓱᓂᑦ ᖃᓄᐃᓕᐅᕐᓂᐅᔪᓂᑦ ᓄᓇᕐᔪᐊᕐᒥᑦ, ᖃᐅᔨᑎᑦᑏᓐᓇᖃᑦᑕᖅᑐᖅ ᑭᓇᐅᓂᖓᓄᑦ ᐊᒻᒪᓗ ᐃᓕᓐᓂᐊᖅᑎᑦᑎᑉᓗᓂ ᑲᓇᑕᒥᑦ ᐃᓄᐃᑦ ᐱᖅᖁᓯᖓᓐᓂᑦ. ᑭᒡᒐᖅᑐᐃᓯᒪᔪᖅ ᒫᓂᑑᐱᒥᑦ ᐊᒻᒪᓗ ᐃᓄᖕᓂᑦ ᐱᑦᑕᐅᑦᑎᐊᖅᑐᓂᑦ ᐃᓂᐅᔪᓂᑦ ᓲᕐᓗ 1996-ᒥᑦ ᐊᑦᓛᓐᑕ ᐅᓕᒻᐱᒃ ᐊᐅᔭᒃᑯᑦ ᕿᑎᕕᒡᔪᐊᖅᑐᓂᑦ ᐊᒻᒪᓗ, ᒫᓐᓇᓵᖑᓂᖅᓴᐅᔪᒥᑦ, 2015-ᒥᑦ ᓄᓇᖃᖅᖄᖅᑐᑦ ᑎᑕᒃᑎᓂᒃ ᐃᓕᑕᕆᔭᐅᔾᔪᑎᑖᖅᑐᖅᑐᓂᑦ ᐅᐃᓂᐲᒡᒥᑦ. ᓂᐱᓕᐅᕆᖃᑎᖃᖅᓯᒪᔪᖅ ᑎᑕᒃᑎᓂᒃ ᑲᓇᑕᒥᑦ ᐊᔪᙱᓐᓂᖃᖅᑐᓂᑦ, ᐃᓚᐅᑉᓗᑎᒃ ᓲᕐᓗ, Weakerthans, Demetra Penner ᐊᒻᒪᓗ Moses Mayes.
ᓂᑭ ᐊᐱᕆᔭᐅᒐᒧᒃᑐᖅ ᓯᓚᑦᑐᖅᓴᕐᕕᖕᓄᐊᖁᔭᐅᑉᓗᓂ ᐊᒻᒪᓗ ᐃᓕᓐᓂᐊᕐᕕᖕᓄᑦ ᒫᓂᑑᐸᒥᑦ ᐃᓕᓐᓂᐊᖅᑎᑦᑎᓂᐊᕐᓗᓂ ᐊᒻᒪᓗ ᑕᑯᒃᓴᐅᑎᓪᓗᒋᑦ ᐃᓄᐃᑦ ᐱᖅᖁᓯᖏᑦ ᑕᒪᐃᓐᓄᑦ ᐃᓕᓐᓂᐊᖅᑎᓄᑦ ᐊᒻᒪᓗ ᐱᓕᕆᔨᓄᑦ. ᐃᓄᐃᑦ ᑲᓇᑕᒥᑦ ᐃᓚᒋᔭᐅᑦᑎᐊᖅᑐᑦ ᑲᓇᑕᐅᑉ ᐱᓯᒪᓂᑯᖏᓐᓄᑦ ᐊᒻᒪᓗ ᐱᖅᖁᓯᖓᓄᑦ, ᑭᓯᐊᓂ ᐊᐃᑦᑖᖑᒐᓗᐊᖅ ᐃᓚᐅᑎᑕᐅᒐᔪᙱᑦᑐᑦ, ᐃᓱᒪᒋᔭᐅᖏᖦᖢᑎᒃ ᐊᒻᒪᓗ ᐳᐃᒍᖅᑕᐅᑉᓗᑎᒃ. ᓂᑭ ᐅᒃᐱᕈᓱᒃᑐᖅ ᐱᒻᒪᕆᐅᔪᖅ ᐃᓄᐃᑦ ᐱᖅᖁᓯᖓᑦ ᐃᖅᖃᐅᒪᔭᐅᓗᓂ ᐳᐃᒍᖅᑕᐅᖏᓪᓗᓂ, ᐃᓕᑕᕆᔭᐅᓗᓂ ᐊᒻᒪᓗ ᖁᕕᐊᓲᑎᒋᔭᐅᓗᓂ ᑲᓇᑕᓗᒃᑖᕐᒥᑦ.
